“Minecraft” virtual dünyası real həyata gəlir

BEY.AZ xarici KİV-ə istinadən xəbər verir ki, “Mojang Studios” və “Merlin Entertainments” tərəfindən həyata keçiriləcək “Maceralar gerçək olur” layihəsi çərçivəsində ABŞ və Böyük Britaniyada iki “Minecraft” tema parkı açılacaq. Parkların 2026 və 2027-ci illərdə istifadəyə verilməsi gözlənilir. “Merlin Entertainments” yeni parklarında “Minecraft”dan ilhamlanan interaktiv əyləncə zonaları, macəra dolu gəzintilər, hədiyyə mağazaları və restoranlar təklif edəcək. Şirkət gələcəkdə bu layihəni digər ölkələrə də yaymağı planlaşdırır.

“Minecraft” tema parklarında yalnız fiziki əyləncə deyil, həm də oyunla əlaqəli rəqəmsal təcrübələr də təqdim ediləcək. Ziyarətçilər parkdakı xüsusi rəqəmsal nöqtələr vasitəsilə oyun daxilində eksklüziv məzmunların kilidini aça biləcək.

“Merlin Entertainments” bu layihə ilə yeni uğura imza atmağı hədəfləyir. Şirkət daha əvvəl “LEGOLAND” kimi məşhur parklarla tanınıb, “Alton Towers Resort”, “Thorpe Park” kimi məkanlara da ev sahibliyi edib.

“Minecraft”ın real dünyaya uyğunlaşdırılması yalnız mövzu parkları ilə məhdudlaşmır. “Warner Bros.” tərəfindən çəkiləcək “Minecraft” filminin 2025-ci ildə nümayişə çıxarılması planlaşdırılır. Filmdə Cek Blek və Ceyson Momoa kimi məşhur aktyorlar rol alacaq.