COP29 çərçivəsində Rio-Trio Təşəbbüsünə həsr olunmuş tədbir keçirildi

BEY.AZ xəbər verir ki, tədbirdə ekologiya və təbii sərvətlər nazirinin müavini Umayra Tağıyeva çıxış edərək bildirib ki, Azərbaycan, Kolumbiya və Səudiyyə Ərəbistanı Krallığı hökumətlərinin yeni tərəfdaşlığı çərçivəsində həyata keçirilən “Rio Üçlüyü” təşəbbüsü çərçivəsində gələcək əməkdaşlıq davam etdiriləcək.

Əməkdaşlığın əsas məqsədi Azərbaycandan BMT-nin İqlim Dəyişmələri üzrə Çərçivə Konvensiyası, Kolumbiyadan BMT-nin Bioloji müxtəliflik haqqında Konvensiyası və Səudiyyə Ərəbistanı Krallığından BMT-nin Səhralaşma ilə mübarizə haqqında Konvensiyasını təmsil edən üç yeni COP Sədrliyinin səylərini koordinasiya etməklə, qlobal dayanıqlılıq təşəbbüslərini gücləndirməkdir. Hər üç ölkə beynəlxalq ictimaiyyəti əməkdaşlıq üçün uzunmüddətli platforma kimi xidmət göstərəcək bu təşəbbüsə qoşulmağa çağırırlar.

Nazir müavini qeyd edib ki, məqsəd hər üç Rio Konvensiyası üzrə əməkdaşlığı gücləndirməklə sinerji yaratmaq, səmərəliliyi artırmaq, həm insanlara, həm də planetə fayda verəcək konkret nəticələri təmin etməkdir: “Bu yanaşma onu göstərir ki, hər bir konvensiyanın məqsədi bir-biri ilə sıx əlaqəlidir və bir sahədə əldə olunan irəliləyiş digərlərində də irəliləyişin əldə olunmasına təkan verə bilər. “Rio Üçlüyü” təşəbbüsünün təməlini təşkil edən və üç ölkə tərəfindən qəbul edilmiş Birgə Bəyannamə iqlim dəyişməsi, biomüxtəlifliyin itirilməsi və səhralaşma kimi bir-biri ilə əlaqəli problemlərin həlli üçün praktiki və koordinasiyalı fəaliyyətlərin vacibliyini vurğulamaqla yanaşı, hökumətlər, çoxtərəfli qurumlar və vətəndaş cəmiyyəti arasında daha güclü tərəfdaşlığa çağırır”.

Sonra BMT-nin Ətraf Mühit Proqramının (UNEP) koordinatoru Nikals Hagelberg çıxış edərək Rio-Trio təşəbbüslərinin BMT tərəfindən dəstəkləndiyini və bu çərçivədə keçiriləcək təbirləri yardım edəcəyini bildirib. Nəzərə çatdırıb ki, yeni dövlətlərin bu təşəbbüslərə qoşulması və real işlər görmək istəkləri planetimizi səhralaşma, biomüxtəlifliyin məhv olması kimi bəlalardan xilas edər.

Sonra Səudiyyə Ərəbistanının, Kolumbiyanın, Hondurasın, Seneqalın, Birləşmiş Ərəb Əmirliklərinin, Barbadosun, Dominikan Respublikasının nümayəndələri çıxış edərək Rio-Trio təşəbbüslərinə qoşulmaq niyyətlərini ifadə ediblər. Qeyd olunub ki, COP29-da iştirak edən dövlətlər səylərini birləşdirərək iqlim dəyişmələrinə qarşı real addımları dəstəkləməli və birgə layihələr hazırlayıb həyata keçirməlidirlər.

Tədbir müzakirələrlə davam edib.