Hizbullah yenidən İsrailə hücum etdi

Livan Hizbullahı ölkənin cənub sərhədində İsrailə qarşı bəzi hücumların həyata keçirildiyini açıqlayıb.

BEY.AZ xəbər verir ki, bu barədə Hizbullaha yaxınlığı ilə tanınan “Al Mayadeen TV”nin saytında məlumat paylaşılıb. Açıqlamada İsrail sərhədindəki Əl-Malikiyyə hərbi məntəqəsinə raket və yüngül silahlarla hücumun təşkil edildiyi bildirilib. İsrail ordusundan verilən açıqlamada Livandan tank əleyhinə raketlə Manara qəsəbəsi və sərhəddəki təhlükəsizlik hasarına hücum edildiyi qeyd edilib. Hücuma artilleriya atəşi ilə cavab verilib. Ölən və yaralananın olmadığı açıqlanıb.

HƏMAS-ın hücumundan sonra Hizbullah ilə İsrail ordusu arasında başlayan qarşıdurmalarda indiyədək 12 Hizbullah üzvü və 2 İsrail əsgəri həyatını itirib.