Musson yağışlarında ölənlərin sayı mini keçən Pakistandan beynəlxalq yardım çağırışı
Pakistanda musson yağışları nəticəsində ölənlərin sayı son 24 saatda 119 nəfər artaraq 1033-ə çatıb. Evlərini tərk edən insanlar daha yüksək və daha quru yerlərə köçdükcə Pakistan hökuməti beynəlxalq ictimaiyyətdən daha çox kömək istədi.
Pakistanda iyun ayının ortalarından başlayan və getdikcə artan musson yağışlarının yaratdığı can itkiləri artmaqdadır. Pakistan Milli Fəlakət İdarəsi son 24 saatda musson yağışları səbəbindən daha 119 nəfərin öldüyünü açıqlayıb. Bununla da təbii fəlakətdə həyatını itirənlərin sayı 1033-ə yüksəlib.
Uzun müddətdir iqtisadi çətinliklərlə mübarizə aparan Pakistanda baş verən təbii fəlakət bir çox insanı köməyə möhtac qoyub. Pakistan rəsmiləri qeyd ediblər ki, indiyədək ABŞ, Böyük Britaniya və Birləşmiş Ərəb Əmirlikləri kömək çağırışına cavab verib, lakin daha çox kömək lazımdır.
Kəndlər su altında qalıb
Musson yağışlarından ən çox zərər çəkən Sind bölgəsində bir çox kəndin su altında qaldığı qeyd edilib.
Rayona gələn şahidlər əlavə ediblər ki, torpaq kənd evləri sel suları ilə palçığa çevrilib. Bəzi kəndlərdə suyun səviyyəsinin həddindən artıq qalxması səbəbindən yalnız ağac zirvələrinin göründüyü qeydə alınıb.
Evlərindən çıxa bilən kənd sakinlərinin hündür nöqtələrə köçdükləri, burada da təmiz su və ərzaq qıtlığının olduğu bildirilib.
“Əhalinin 15 faizi təbii fəlakətdən zərər çəkib”
Pakistanın baş naziri Şahbaz Şərif bildirib ki, təbii fəlakətdən ölkə əhalisinin 15 faizinə bərabər olan 33 milyon insan zərər çəkib.
Baş nazir Şərif bildirib ki, bu yağışlı mövsümdə yaşanan itkilər 2010-11-ci illərlə müqayisə oluna bilər və bu, tarixdəki ən pis ildir.
Ölkə rəsmiləri dağıntıların səbəbinin iqlim dəyişikliyi olduğunu iddia edirlər.
Lakin bildirilir ki, yerli özünüidarəetmə orqanlarının planlaşdırma zəifliyi səbəbindən daşqın riski olan ərazilərdə tikintinin davam etdirilməsi fəlakətin nəticələrinin artmasına səbəb olur.