Bu ölkədə referendum keçiriləcək: Olimpiada üçün

Almaniyanın Hamburq şəhər rəhbərliyi 2026-cı il mayın 31-də yay Olimpiya Oyunlarının 2036, 2040 və ya 2044-cü illərdə keçirilməsi üçün müraciət edilməsi ilə bağlı yerli referendum keçiriləcəyini elan edib.

bey.az xəbər verir ki, bu, Almaniyada Olimpiya oyunları ilə bağlı ikinci referendum olacaq. Bu ilin oktyabrın 26-da Münhen sakinləri də öz mövqelərini bildirəcəklər.

Milli seçimdə həmçinin Berlin və Şimali Reyn-Vestfaliya regionu iştirak edir, lakin burada hələlik əhali arasında səsvermə planlaşdırılmır. Hamburqdakı referendumun keçirilməsinə 6 milyon avro, Olimpiya ərizəsinin ilkin mərhələsinə isə 17 milyon avro xərclənəcək.

Almaniya İdman İttifaqı (DOSB) 2026-cı ilin payızında Yay Olimpiya Oyunlarına namizəd şəhəri və ya regionu müəyyən edəcək. Seçimin hansı meyarlarla aparılacağı hələ dəqiq deyil. Hamburqun əvvəlki Olimpiya təşəbbüsü 2015-ci ildə uğursuz olmuşdu. Şəhər sakinləri 2024-cü ildəki yarışın təşkili ilə bağlı xərclərə qarşı səs vermişdilər.

Almaniya sonuncu dəfə 1972-ci ildə Münhendə Olimpiya oyunlarına ev sahibliyi edib.

Qeyd edək ki, 2036-cı il Olimpiadasına maraq göstərən digər ölkələr sırasında Hindistan, Qətər, Türkiyə, İndoneziya, Çili, Macarıstan və Danimarka var. Bu məsələ ilə bağlı Beynəlxalq Olimpiya Komitəsinin qərarı ən geci 2029-cu ilə qədər açıqlanacaq.