Rusiyada qətl və xüsusilə külli miqdarda dələduzluqla bağlı aparılan cinayət işi üzrə 8 nəfər məsuliyyətə cəlb olunub. İşin fiqurantları arasında biznesmenlər, şirkət rəhbərləri, işsiz şəxslər, taksi sürücüsü, eləcə də aktyor Mixail Yefremovun keçmiş vəkili Elman Paşayevin oğlu Elvin Paşayev də var.
BEY.AZ Teleqraf-a istinadən xəbər verir ki, bu barədə TASS-ın əldə etdiyi cinayət işi materiallarında bildirilir.
Sənədlərə əsasən, Elvin Paşayev xüsusilə külli miqdarda dələduzluğun iki epizodunda ittiham olunur. O, ittihamları qəbul etmir və cinayətlərdə iştirakının olmadığını bildirir.
İş üzrə digər fiqurantlar arasında fərdi sahibkar Dmitri Vlasov, özünüməşğul Nazeli Xaçatryan, “True Crime” şirkətinin baş direktoru Anton Prokopoviç, taksi sürücüsü Bulat Abdullayev və digər şəxslər var.
İstintaq materiallarına görə, Vlasov, Paşayev, Prokopoviç və digər şəxslərə Rusiya Cinayət Məcəlləsinin dələduzluq və dələduzluğa cəhd maddələri ilə ittiham irəli sürülüb.

Cinayət işinin əsasını Moskva sakinlərinə məxsus mənzillərin qanunsuz ələ keçirilməsi ilə bağlı epizodlar təşkil edir.
İstintaqın versiyasına əsasən, cinayətkar sxemin iştirakçıları öldürülmüş şəxslərdən birinə məxsus mənzili satmağa və əldə olunan pulları mənimsəməyə cəhd ediblər.
İş materiallarında bildirilir ki, taksi sürücüsü Bulat Abdullayev və onun tanışı satılmış mənzilin pulunun köçürüldüyü bank hesabından vəsaiti çıxarmalı olublar.
Abdullayev istintaq zamanı təqsirini etiraf edib və peşman olduğunu bildirib.
“Mən təqsirimi etiraf etmişəm, peşmanam və istintaqdan gizlənmək niyyətində deyiləm”, – onun ifadəsində qeyd olunub.
Bununla yanaşı, Abdullayev məhkəmədə cinayət törətmək məqsədinin olmadığını deyib. Müdafiə tərəfi isə bildirib ki, o, daha əvvəl – 2025-ci ilin mayında polis tərəfindən saxlanılıb, lakin sonradan sərbəst buraxılıb və Moskvaya qayıdaraq taksi sürücüsü kimi işləməyə davam edib.
Meyit parkda tapılmışdı
Cinayət işi ilə bağlı ən diqqətçəkən epizodlardan biri 2024-cü ilin oktyabrında baş verib.
Həmin vaxt Moskvanın şimal-qərbində, Svoboda küçəsi yaxınlığındakı parkda qara sellofan torbaya bükülmüş insan qalıqları aşkarlanıb.
Moskva İstintaq Komitəsi həmin faktla bağlı məlumat yaymış, şəhər prokurorluğu isə araşdırmanı xüsusi nəzarətə götürmüşdü.
Sonrakı istintaq zamanı bu hadisənin mənzil dələduzluğu ilə bağlı cinayət işi ilə əlaqəsi araşdırılmağa başlanıb.
İş materiallarına əsasən, 2025-ci il oktyabrın 22-də Moskva sakinlərindən birinin itkin düşməsi faktı üzrə qətl işi başlanıb.
2026-cı il yanvarın 30-da mənzil üzərində mülkiyyət hüququnun qanunsuz əldə edilməsi ilə bağlı daha bir cinayət işi açılıb. Fevralın 12-də isə dələduzluq üzrə növbəti iş başlanıb.
Elvin Paşayev və digər şəxslərlə bağlı ayrıca iş 2026-cı il fevralın 27-də qətl işi üzrə toplanmış materiallardan ayrılıb.
Meyit eksqumasiya edilib
İstintaq çərçivəsində ölən şəxslərdən birinin meyiti eksqumasiya olunub.

Cinayət işi üzrə müqayisəli molekulyar-genetik ekspertiza, tibbi-kriminalistik ekspertiza və məhkəmə-xətşünaslıq ekspertizası keçirilib.
Bundan başqa, təqsirləndirilən şəxslərin psixoloji-psixiatrik müayinələrinin keçirilməsi, onların telefon danışıqları və əlaqələri barədə məlumatların araşdırılması nəzərdə tutulub.
İstintaq orqanları bildiriblər ki, iş üzrə səkkiz nəfərin ittiham olunması, çoxsaylı istintaq hərəkətlərinin aparılması və böyük həcmdə sübutların toplanması araşdırmanı mürəkkəbləşdirir.
Məhkəmə təqsirləndirilən şəxslər barəsində seçilmiş qətimkan tədbirlərinin müddətini bir neçə ay uzadıb.
Fiqurantlardan biri ev dustaqlığına buraxılıb, digərləri isə istintaq təcridxanasında saxlanılır.
Elvin Paşayev ittihamları qəbul etmir
Cinayət işinin əsas fiqurantlarından biri Elvin Paşayevdir. O, “Elman Group” beynəlxalq hüquq şirkətinin baş direktoru Elman Paşayevin oğludur.
İstintaq Elvin Paşayevi xüsusilə külli miqdarda dələduzluğun iki epizodunda ittiham edir.
Paşayev özünü təqsirli bilmir.
İş üzrə digər təqsirləndirilən Dmitri Vlasov da ittihamları qəbul etməyib və cinayətlərə aidiyyəti olmadığını bildirib.
Elman Paşayev də həbs olunub
Elvin Paşayevin atası, keçmiş vəkil Elman Paşayev də hazırda ayrıca cinayət işi üzrə təqsirləndirilir.
Rusiya İstintaq Komitəsinin hərbi istintaq orqanları onun barəsində xüsusilə külli miqdarda dələduzluq və dələduzluğa cəhd maddələri üzrə istintaqı başa çatdırıb.
Elman Paşayev daha əvvəl 46 milyon rubldan çox məbləğdə dələduzluqda ittiham olunaraq hərbi məhkəmənin qərarı ilə həbs edilmişdi.
İstintaqın versiyasına görə, Paşayev bloqer Yelena Blinovskayanın həyat yoldaşı Aleksey Blinovskiyə onu və həyat yoldaşını vergidən yayınma işi üzrə cinayət məsuliyyətindən azad etdirməyə kömək edəcəyini vəd edib.
Bunun müqabilində ondan böyük məbləğdə pul aldığı iddia olunur.
Cinayət işi üzrə zərərçəkmiş kimi tanınan Aleksey Blinovski üzləşmə zamanı Paşayevə 100 min dollar verdiyini bildirib.
Elman Paşayev geniş ictimaiyyətə aktyor Mixail Yefremovun vəkili kimi tanınıb. O, ölümcül yol qəzasına görə mühakimə olunan Yefremovu məhkəmə prosesində müdafiə edib.
Hazırda Elvin Paşayev və digər yeddi fiqurantla bağlı cinayət işi üzrə istintaq davam edir.