BEY.AZBEY MEDİA

Bakının Sabunçu rayonu Pirşağı qəsəbəsi ərazisində – Dənizkənarı yolun kənarında qazılmış kanalizasiya quyusuna daha bir avtomobil düşüb.
BEY.AZ Qafqazinfo-ya istinadla xəbər verir ki, sutkanın qaranlıq vaxtı həmin quyuya “Toyota Aqua” markalı avtomobil düşüb.
Qəzaya uğrayan minik avtomobili quyudan xüsusi kran vasitəsilə çıxarılıb.
Qeyd edək ki, bir neçə gün əvvəl də qeyd edilən quyuya avtomobil düşmüşdü.

Sözügedən görüntüləri təqdim edirik:

İran ordusu ABŞ-ın təkrar hücumları halında Yaxın Şərqdəki bütün ABŞ bazalarına hücum etməyə hazır olduğunu bildirib.
Çərşənbə axşamı ABŞ ordusu İrana qarşı bir sıra güclü zərbələr endirib. ABŞ Mərkəzi Komandanlığı bunun İranın Hörmüz boğazından keçən ticarət gəmilərinə qarşı hərəkətlərinə cavab olaraq edildiyini iddia edib.
BEY.AZ xəbər verir ki, dövlət xəbər agentliyi IRNA-nın verdiyi məlumata görə, ABŞ tərəfindən atəşkəsin təkrar pozulmasının nəticələri bu ölkənin üzərinə düşəcək:
“Bütün bazalar ordunun pilotsuz təyyarələrinin hücumları üçün qanuni hədəflərə çevriləcək”.

İran ordusu Bəhreyndə Şeyx İsa hava bazasındakı hədəflərə hücum etdiyini, İslam İnqilabı Keşikçiləri Korpusu isə Küveytdəki Əli əl-Salem hava bazasına və Bəhreyndə ABŞ-ın Beşinci Donanmasının Port Salman limanına zərbələr endirdiyini bildirib.

Müəllif: Tural

Son illər dünyanın bir çox ölkəsində stasionar (ev) telefonlar tədricən istifadədən çıxarılır. Mobil rabitənin və internet üzərindən zəng xidmətlərinin sürətli inkişafı ənənəvi rabitəyə ehtiyacı minimuma endirib. Finlandiya, Estoniya, Niderland, Norveç və İspaniya kimi dövlətlər artıq mis kabellərə əsaslanan köhnə analoq şəbəkələrini tamamilə qapadıblar.
Azərbaycanda isə fərqli mənzərə yaranıb. Əvvəlcə stasionar telefonların aylıq abonent haqqı artırıldı, hazırda isə Aztelekom operatorlarının təqdim etdiyi internet paketlərinin əksəriyyətinə ev telefonu xidməti də daxil edilir. Bir çox abonent real olaraq ev telefonundan istifadə etməsə də, bu xidməti internet paketindən ayırmağın qeyri-mümkün olmasından gileylənir.
Bəs rəqəmsallaşma əsrində ev telefonları nə dərəcədə aktualdır və bu xidmət Azərbaycanda da tarixə qovuşa bilərmi? Ən əsası, istifadə olunmayan stasionar xidməti paketdən ayırmaq niyə çətindir və operatorları internetlə ev telefonunu birlikdə satmağa vadar edən səbəblər hansılardır?
Mövzu ilə bağlı BEY.AZ-a açıqlama verən ekspert Razi Abasbəyli bildirdi ki, Azərbaycanda stasionar telefonların yaxın gələcəkdə tamamilə sıradan çıxması gözlənilmir:
“Xüsusilə dövlət qurumlarında, büdcə təşkilatlarında və nazirliklərarası daxili kommunikasiyada stasionar rabitə hələ də öz əhəmiyyətini qoruyur. Digər tərəfdən, yaşlı nəslin nümayəndələri üçün bu telefonlardan istifadə daha rahatdır. Lakin rəqəmsal transformasiya fonunda ənənəvi ev telefonlarına tələbatın tədricən azalması qaçılmazdır”.

Ekspert vurğuladı ki, rəqəmsallaşma stasionar telefonların tam ləğvi anlamına gəlmir:
“Avropa ölkələrində bu sahədə fərqli model tətbiq olunur. Orada stasionar rabitə ləğv edilməyib, əksinə, rəqəmsallaşdırılaraq internet paketlərinə inteqrasiya olunub. Yəni köhnə mis kabellərdən imtina edilərək fiber-optik şəbəkəyə keçid baş verib. Bu həm xidmətin maya dəyərini azaldır, həm də keyfiyyəti artırır. Bir sözlə, Avropada stasionar telefonlar saxlanılır, lakin onların istifadə prinsipi dəyişdirilir”.

Ekspertin sözlərinə görə, Azərbaycanda da artıq bəzi operatorlar internet, televiziya və digər rəqəmsal xidmətləri vahid paket şəklində təqdim edirlər:
“Ölkəmizdə internet paketi ilə birlikdə rəqəmsal televiziya xidmətlərinin birgə təklif olunması təcrübəsi var və abunəçilər eyni paket çərçivəsində hər iki xidmətdən yararlana bilirlər. Avropada stasionar telefon xidməti məhz bu prinsiplə işləyir. Orada telefon xidməti internet üzərindən, yəni IP texnologiyası vasitəsilə göstərilir. İstifadəçilər vahid tariflərlə zəng edə, SMS göndərə, səs, foto və digər rəqəmsal xidmətlərdən faydalana bilirlər. Həm mənzillər, həm də dövlət müəssisələri üçün tətbiq edilən bu sistemin xidmət haqqı da yüksək olmur”.
R.Abasbəyli qeyd etdi ki, Azərbaycanda internet xidmətinin stasionar telefon xəttinə məcburi şəkildə bağlanması istifadəçilərin haqlı narazılığına səbəb olur:
“Böyük internet provayderlərinin əksəriyyəti xidməti stasionar telefon xətti üzərindən təqdim edir. Hətta fiber-optik kabel çəkilsə belə, bir çox hallarda bu xidməti telefon xəttindən tam ayırmaq texniki və ya kommersiya baxımından mümkün olmur. Hesab edirəm ki, yaxın illərdə Azərbaycanda stasionar telefonların tam ləğvi real deyil. Ən real variant onların internet üzərindən işləyən rəqəmsal modelə keçirilməsidir. Bu model Avropada uğurla tətbiq olunur. Lakin belə bir keçid üçün geniş fiber-optik infrastrukturun qurulmasına və böyük investisiyalara ehtiyat var. Məhz bu səbəbdən stasionar telefonlar hələ uzun müddət aktuallığını qoruyacaq”.
Müəllif: Gülnar Süleymanova

Venesuelada baş verən dağıdıcı zəlzələ nəticəsində həlak olanların sayı 3685 nəfərə çatıb.
BEY.AZ xəbər verir ki, bu barədə ölkənin Milli Assambleyasının sədri Xorxe Rodriges “X” sosial şəbəkəsində məlumat verib.
Rəsmi məlumatlara görə, 16 740 nəfər xəsarət alıb, 17 907 sakin evsiz qalıb. 190 bina tamamilə dağılıb, daha 856 binaya ciddi ziyan dəyib.
Axtarış-xilasetmə işləri zamanı 6462 nəfəri xilas etmək mümkün olub. 25 970 zərərçəkənə tibbi yardım göstərilib, 86 794 ailəyə dəstək verilib. Bundan əlavə, ehtiyacı olanlara 9,6 min tondan çox ərzaq paylanıb.
İyunun 24-də Venesuelada iki silsilə güclü zəlzələ baş verib. ABŞ Geoloji Xidmətinin qiymətləndirməsinə görə, birinci yeraltı təkanın maqnitudası 7,2, ikincisinin isə 7,5 olub.

Venesuela prezidentinin səlahiyyətlərini icra edən Delsi Rodriges zəlzələ qurbanlarının xatirəsinə yeddi günlük milli matəm elan edib.
Hüseyn İbadlı

Bu gün Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi, lakin gecə və səhər bəzi yerlərdə yağış yağacağı gözlənilir. Arabir güclənən şimal-qərb küləyi əsəcək.
Bu barədə BEY.AZ-a Milli Hidrometeorologiya Xidmətindən məlumat verilib.
Bildirilib ki, havanın temperaturu gecə 19-22° isti, gündüz 26-29° isti olacaq. Atmosfer təzyiqi 757 mm civə sütunu, nisbi rütubət isə gecə 70-75 %, gündüz 60-65 % təşkil edəcək.
Azərbaycanın rayonlarında bəzi yerlərdə arabir yağış yağacağı gözlənilir. Ayrı-ayrı yerlərdə qısamüddətli intensiv olacağı, şimşək çaxacağı, dolu düşəcəyi, gecə və səhər bəzi şimal və qərb rayonlarında yağıntıların güclənəcəyi ehtimalı var. Gecə və səhər bəzi dağlıq ərazilərdə duman olacaq. Qərb küləyi bəzi yerlərdə arabir güclənəcək.

Havanın temperaturu gecə 20-24° isti, gündüz 30-34° isti, dağlarda gecə 11-16° isti, gündüz 18-23°, bəzi yerlərdə 25-28° isti olacaq.

İranın Qeşm və Xarq adalarında yeni partlayışlar baş verib.
BEY.AZ xəbər verir ki, bu barədə “Press TV” telekanalı məlumat yayıb.
“Qeşm adasında partlayışların yenidən baş verməsi ilə bağlı xəbərlər gəlir. İranın cənubundakı Xarq adasında da bir neçə partlayış səsi eşidilir”, – deyə məlumatda bildirilir.
İyulun 8-nə keçən gecə ABŞ hərbçiləri İrana qarşı bir sıra zərbələr endirib. Birləşmiş Ştatların Silahlı Qüvvələrinin Mərkəzi Komandanlığı bildirib ki, hücumlar İslam Respublikasının Hörmüz boğazından keçən üç ticarət gəmisinə zərbələr endirməsinə cavab olaraq həyata keçirilib.

Xəbər verildiyi kimi, Hörmüz boğazındakı İranın Qeşm adasında altı partlayış baş verib. Həmçinin İranın Bəndər-Abbas və Sirik şəhərlərində də bir neçə partlayış qeydə alınıb.

Hüseyn İbadlı

ABŞ, Kanada və Meksikanın birgə ev sahibliyi etdiyi futbol üzrə dünya çempionatının 1/4 final mərhələsinin bütün cütləri müəyyənləşib.
BEY.AZ xəbər verir ki, bu raundda üz-üzə gələcək bütün komandaların adlarına 1/8 finalın son oyunundan sonra aydınlıq gəlib.
Bu mərhələdə aşağıdakı qarşılaşmalar keçiriləcək:
10 iyul
00:00. Fransa – Mərakeş

23:00. İspaniya – Belçika

12 iyul
01:00. Norveç – İngiltərə
05:00. Argentina– İsveçrə
Qeyd edək ki, tarixdə ilk dəfə 48 komandanın iştirak etdiyi dünya çempionatı iyulun 19-da başa çatacaq.

Rusiya ordusu iyulun 8-nə keçən gecədən başlayaraq Kiyev şəhərinə intensiv hava hücumu edir.
BEY.AZ xəbər verir ki, hava hücumu zamanı ballistik raketlərdən istifadə olunur.
Güclü partlayış səsləri eşidilir. Şəhərin bəzi ərazilərini tüstü bürüyüb.
Kiyev şəhər meri Vitali Kliçko teleqram səhifəsində yazıb ki, artıq Desnyansk və Svetyoşin rayonlarında dağıntılar var.

Qeyd edək ki, iyulun 6-na keçən gecə Kiyevə edilən kütləvi raket və dron zərbələri nəticəsində 19 mülki şəxs həlak olub, 60 nəfəri isə xəsarət alıb.

Bu gün Bakının Sabunçu, Yasamal, Binəqədi və Suraxanı rayonlarının bəzi küçə və qəsəbələrində təbii qazın verilişində müvəqqəti məhdudiyyət yaranacaq.
Bu barədə BEY.AZ-a Azərbaycan Dövlət Neft Şirkətinin “Azəriqaz” İstehsalat Birliyindən məlumat verilib.
Məlumata görə, təmir-quraşdırma və payız-qış mövsümünə hazırlıq işləri ilə əlaqədar iyulun 8-də saat 10:00-dan işlər yekunlaşanadək Sabunçu rayonunun Nardaran qəsəbəsinin, Azərbaycan qadını və Albalılıq küçələrinin, Yasamal rayonunun F. İbrahimbəyov, M. Naxçıvani, C. Cabbarlı, C. Qaryağdıoğlu və Z. Əhmədbəyov küçələrinin, Binəqədi rayonunun Xocəsən və Sulutəpə qəsəbələrinin (bir hissəsi), Suraxanı rayonunun Əmircan qəsəbəsinin, 5-ci Mədən və X.Ələkbərov küçələrinin qaz təchizatında qısamüddətli fasilə yaranacaq.

İsrailin Baş naziri Benyamin Netanyahu ABŞ Prezidenti Donald Trampla fikir ayrılıqlarının olduğunu bəyan edib.
BEY.AZ xəbər verir ki, o, bu barədə CNN telekanalının efirində bildirib.
Netanyahu söyləyib ki, Trampla münasibətlərində vaxtaşırı müxtəlif fikirlər yaranıb.
“O, ABŞ-ın prezidentidir və Birləşmiş Ştatlar üçün yaxşı olanı edir. Mən isə İsrailin Baş naziriyəm və İsrail üçün vacib və yaxşı olanı edirəm”, – deyə o etiraf edib.
Bununla belə, Netanyahu qeyd edib ki, əksər hallarda İsrail və ABŞ-ın maraqları üst-üstə düşür. Onun fikrincə, ölkələr əsl müttəfiqdirlər.

Daha əvvəl Netanyahu ABŞ və İsrail münasibətləri haqqında danışarkən bildirmişdi ki, ölkələrin İranla bağlı vahid məqsədi var.
“Biz istəyirik ki, İran nüvə silahı yaratmaq proqramından imtina etsin”, – deyə Netanyahu qeyd edib.
Hüseyn İbadlı

Futbol üzrə dünya çempionatında Argentina və Misir yığmaları arasında keçirilən 1/8 final matçının ən yaxşı oyunçusu bəlli olub.
BEY.AZ xəbər verir ki, argentinalıların heyətində Lionel Messi oyunun ən yaxşısı adına layiq görülüb.
Qeyd edək ki, kapitan sözügedən matçda (3:2) komandasının ikinci qolunu vurub.

İyulun 8-də Biləsuvar və Cəlilabadın bəzi ərazilərində işıq olmayacaq.
BEY.AZ xəbər verir ki, Biləsuvar Elektrik Şəbəkəsi (EŞ) ərazisində 110/35/10/6 kV-luq “Səmədabad” yarımstansiyasından çıxan 35 kV-luq “Səmədabad” hava xəttində təmir işləri görüləcək.
Buna görə də sabah saat 10:00-dan 12:00-dək Arazbarı, Nərimankənd və Səmədabad kəndləri gərginliksiz qalacaq.
Həmçinin Cəlilabad EŞ ərazisində yerləşən 110/35/10 kV-luq “Cəlilabad” yarımstansiyasından çıxan 110 kV-luq “Cəlilabad” hava xəttində təmir işləri aparılacaq. Bununla əlaqədar saat 13:00-dan 15:00-dək Biləsuvarın Amankənd, Cəlilabadın Günəşli, Sabirabad, Alar kəndlərinə elektrik verilişində məhdudiyyət yaranacaq.

Təmir və yenidənqurma işləri yekunlaşdıqdan sonra həmin ərazilər elektrik enerjisi ilə təmin olunacaq.

UEFA Çempionlar Liqasındakı ilk qələbə münasibətilə hər kəsi təbrik edirəm.
BEY.AZ xəbər verir ki, bu sözləri UEFA Çempionlar Liqasının I təsnifat mərhələsinin ilk oyununda doğma meydanda Uelsin TNS klubunu 2:0 hesabı ilə məğlub edən “Sabah”ın baş məşqçisi Valdas Dambrauskas mətbuat konfransında deyib.
Litvalı mütəxəssis oyunun çətin keçəcəyini əvvəlcədən bildiklərini söyləyib: “Futbolçulara da bunu demişdik. Səbirli oynamaq vacib idi. Qarşıda bizi süni örtüklü meydançada keçiriləcək cavab görüşü gözləyir. Həmin matçda daha diqqətli və tam konsentrasiyalı olmalıyıq. Oyunun sonlarında azlıqda qaldıq. Rəqib iki top fərqini aradan qaldırmaq üçün irəli atılacaq. Biz isə onların buraxacağı boşluqlardan maksimum yararlanmağa çalışacağıq”.
O bildirib ki, ilk hissədən sonra oyun planını dəyişməyə ehtiyac görməyiblər: “İstəyimiz boş zonalara sürətli keçidlər etmək idi. İlk qolu künc zərbəsindən vurduq. İkinci qol isə məhz planlaşdırdığımız hücumun nəticəsi oldu. İlk dəqiqələrdən oyuna nəzarət edən tərəf biz idik və düşünürəm ki, qələbəyə layiq idik”.
Çalışdırıcı müdafiəçi Stiv Solvetin qırmızı vərəqə almasının cavab matçına təsirini hələlik qiymətləndirməyin çətin olduğunu söyləyib: “Stiv bizim üçün çox önəmli futbolçudur. Ancaq onun mövqeyində çıxış edə biləcək iki oyunçumuz var. Onların bu itkini kompensasiya edəcəyinə inanıram. Qırmızı vərəqənin təsirini isə cavab görüşündə görəcəyik”.

Baş məşqçi komandasının daha çox qol vurmaq imkanlarının olduğunu da bildirib: “Əlbəttə, daha böyük hesablı qələbə qazanmaq istərdik. Bununla belə, 2:0 hesabı da yaxşı nəticədir. İnanıram ki, cavab görüşündə rəqib daha açıq futbol oynayacaq və bu, bizə əlavə imkanlar yaradacaq”.
Qeyd edək ki, komandalar arasında cavab görüşü iyulun 14-də keçiriləcək.

Müğənni Günel Zeynalova sosial şəbəkədə paylaşdığı videosu ilə diqqət çəkib.
BEY.AZ xəbər verir ki, sənətçi küçədə gənc ifaçının canlı çıxışına biganə qala bilməyib.
Günel gəncin oxuduğu məşhur “Delalım” mahnısının sədaları altında küçədə rəqs edib.
Həmin görüntüləri təqdim edirik:

Your browser doesn’t support video.
Please download the file: video/mp4

“Cənab Prezident olmasaydı, bu sammitə qatılmazdım”.
BEY.AZ xəbər verir ki, bunu NATO-nun Ankara keçirilən sammiti çərçivəsində Türkiyə Prezidenti Rəcəb Tayyib Ərdoğanla görüşən ABŞ Prezidenti Donald Tramp deyib.
ABŞ lideri Türkiyənin hərbi gücünə və Ərdoğanın liderliyinə təriflər yağdırıb. Tramp Türkiyənin müttəfiqlikdəki əsas rolunu və ikitərəfli dostluğu vurğulayıb.
36-cı NATO Liderlər Sammiti və rəsmi səfər çərçivəsində Ankarada olan ABŞ Prezidenti Donald Tramp rəsmi qarşılanma mərasimindən sonra Prezident Ərdoğanla açıqlamalar verib.
Tramp Türkiyə ilə ABŞ arasındakı münasibətlərin “tərifəlayiq” olduğunu bildirib.

Ərdoğanla olan dostluğundan bəhs edən Tramp, qarşılanmadan duyduğu məmnuniyyəti bu sözlərlə dilə gətirib:
“Çox təşəkkür edirəm. Hamının bildiyi və yazıldığı kimi, biz çox yaxşı dostuq. Cənab Prezident çox yaxşı iş görür. Aeroportda bizi qarşıladı. Hətta mənim adımı daşıyan bir bina da var; bu, çox gözəl bir şeydir. Bura gələrkən gördük. O, fantastik bir liderdir, bütün dünyada hörmət edilən bir liderdir. Əvvəldən bəri “kimyamız” çox yaxşı tutdu, olduqca yaxşı münasibətlərimiz var”.

“Cənab Prezidentin rəhbərliyi altında Türkiyə hərbi mənada çox qüvvətli bir ölkə halına gəldi. İnsanlar Türkiyənin nə qədər güclü olduğunu bilir; avadanlıqları, əsgərləri fantastikdir. Və gözəl tərəfi budur ki, Türkiyə ilə münasibətlərimiz həqiqətən tərifəlayiqdir və münasibətlərimiz indiyədək həmişə yaxşı gedib. Cənab Prezidentə çox böyük hörmətim var. Bu, hər iki ölkənin xeyrinə olacaq”, – Türkiyənin müdafiə sənayesi və hərbi potensialını yüksək qiymətləndirən Tramp deyib.
Görüşün gündəliyi haqqında da məlumat verən Tramp bildirib:
“Bu gün ticarətdən, hərbi sahədən və digər bir çox mövzudan, bəlkə İran məsələsindən də danışacağıq. İranın ordusunu tamamilə istifadəsiz hala gətirdik, nüvə silahları olmayacaq. Türkiyə ilə çox gözəl ticarət edirik; biz gözəl işlər görürük, onlar gözəl işlər görür və bunları qarşılıqlı ticarət edirik. Yalnız bunu söyləmək istəyirəm: sizinlə olmaq böyük bir şərəfdir. Çox gözəl görüşlər, çox gözəl axşam yeməkləri… Çox gözəl işlər görmüşük, görürük və görəcəyik də. Təşəkkür edirəm, Cənab Prezident”.
Hüseyn İbadlı

Respublika Təcili və Təxirəsalınmaz Tibbi Yardım Mərkəzində yeni təyinat olub.
BEY.AZ “Unikal”a istinadən xəbər verir ki, bununla bağlı müvafiq əmr imzalanıb.
Əmrə əsasən, Fuad Nəbiyev Mərkəzə direktor müavini təyin edilib.

Qeyd edək ki, F.Nəbiyev bu təyinatadək Əmək və Əhalinin Sosial Müdafiəsi Nazirliyinin Dövlət Tibbi Sosial Ekspertiza və Reablitasiya Agentliyinin Strateji planlaşdırma və innovasiyalar şöbəsinin müdiri vəzifəsində işləyib.