Braziliya millisinin və “Real Madrid”in keçmiş müdafiəçisi Roberto Karlos mərakeşli Suheiyla əl-Tahiri ilə evləndikdən sonra İslamı qəbul etməsi ilə bağlı şayiələrə ilk dəfə münasibət bildirib.
BEY.AZ xəbər verir ki, daha əvvəl Türkiyə mediası 53 yaşlı braziliyalının San Pauloda Şeyx Cihad Həməda ilə görüşdə guya Şəhadə kəlməsini (İslamı qəbul etməsini bildirən ifadə) dediyini iddia etmişdi.
Bu məlumat türk millət vəkili Əli Şahinin şeyxin sözlərini sitat gətirməsindən sonra geniş şəkildə işıqlandırılmışdı.
Lakin Karlos özü məlumatı etibarsız adlandırıb.

“İslama dərin hörmətim var. Həyat yoldaşımın namaz qıldığını görməyimə şadam, amma mənim İslamı qəbul etməyimlə bağlı şayiələr yalandır”, – deyə keçmiş futbolçu “Okaz” nəşrinə bildirib.

Karlos həmçinin izah edib ki, toy mərasimində ailə üzvlərinin katolik ənənələri və həyat yoldaşı ilə dostlarının dini inancları nəzərə alınmaqla fərqli mərasimlər keçirilib.