“Real Madrid”in braziliyalı hücumçusu Endrik Çempionlar Liqasında “Roma” ilə qarşılaşmada sərgilədiyi oyunla diqqət mərkəzinə düşüb. Gənc futbolçunun çıxışı onun gələcəyi və baş məşqçi Joze Mourinyonun taktiki planları ilə bağlı müzakirələri yenidən gündəmə gətirib.
BEY.AZ xəbər verir ki, İspaniyanın “AS” nəşrinin məlumatına görə, Endrik “Roma” ilə 3:3 hesabı ilə başa çatan matçda vurduğu möhtəşəm baş zərbəsi ilə hesabı bərabərləşdirib. Braziliyalı hücumçu həm qol vurmaqla, həm də rəqib müdafiəçilər üçün yaratdığı təhlükə ilə seçilib. O, görüş ərzində iki uğurlu driblinq edib ki, bu da Kilian Mbappenin göstəricisindən iki dəfə çoxdur.
Mourinyo ötən yay transfer dönəmində Endrikin komandadan ayrılmayacağını bildirmişdi. Futbolçunun uzunmüddətli əzələ zədəsi keçirməsinə baxmayaraq, portuqaliyalı mütəxəssis ona güvəndiyini nümayiş etdirib. Bununla belə, “AS”ın yazdığına görə, Mourinyo Endrikin mərkəz hücumçusundan daha çox sağ cinahda oynamağa uyğun olduğunu düşünür. “Roma” ilə görüş də bu fikrin təsdiqi kimi qiymətləndirilir.
Baş məşqçi fərqli xüsusiyyətlərə malik hücumçu transfer etmək istəyib və təqdim olunan namizədlər arasından Espini seçib. Mourinyo ispaniyalı futbolçunun Endriklə birlikdə oynaya biləcəyinə inanır. Bu isə komandanın taktiki quruluşunda hər iki hücumçuya yer tapılmasının mümkün olduğunu göstərir.

Endrik matçdan sonra inancının ona güc verdiyini bildirib: “Allah ilə danışırdım”. O, Mourinyonun qərarlarına hörmətlə yanaşdığını da vurğulayıb: “Oynamalı olsam, Mourinyo məni meydana buraxacaq. Əgər belə deyilsə, oynamayacağam. Mənim üçün ən yaxşı qərarı o verəcək, mən də komandaya kömək etmək üçün hazır olacağam”.

Nəşrin yazdığına görə, “Real Madrid” rəhbərliyi “Roma” ilə oyundakı çıxışın Endrik üçün yeni başlanğıc ola biləcəyini düşünür. Braziliyalının yüksəlişi fonunda əsas sual isə heyətdə hansı hücumçunun mövqeyini itirəcəyi və Mourinyonun yeni taktiki planında kimə üstünlük verəcəyidir.