İtaliyanın “Yuventus” klubunda maliyyə vəziyyəti ilə bağlı ciddi narahatlıq yaranıb. Klubun baş icraçı direktoru Covanni Karnevalinin “La Gazzetta dello Sport”a verdiyi açıqlamalar komandanın gələcək transfer siyasətinin maliyyə məhdudiyyətlərindən ciddi şəkildə asılı olacağını göstərib.
BEY.AZ xəbər verir ki, 2026/2027 mövsümü Turin təmsilçisi üçün mühüm mərhələ hesab olunur. Baş məşqçi Luçano Spallettinin üzərində təzyiq artsa da, klub rəhbərliyinin əsas diqqəti maliyyə göstəricilərinə və komandanın Çempionlar Liqasına vəsiqə qazanmasına yönəlib.
Karnevali bildirib ki, Çempionlar Liqasına vəsiqə qazanılmaması “Yuventus” üçün ciddi maliyyə itkisinə səbəb ola bilər. Klubun rəhbəri iki il ardıcıl olaraq turnirdən kənarda qalmağın vəziyyəti daha da çətinləşdirəcəyini vurğulayıb.
“Əsas məsələ qalib gəlməkdir. Bəli, qalib gəlməlisən. Amma bunu necə edəcəyini də başa düşməlisən. Dördüncü yer artıq futboldan çox biznes məsələsinə çevrilib. Çempionlar Liqasına düşsən, bir vəziyyətdir, düşməsən, tamamilə qan gölünə çevrilir”, – deyə Karnevali bildirib.
Klub rəhbəri UEFA ilə imzalanmış razılaşmanın da transfer siyasətinə müəyyən məhdudiyyətlər qoyduğunu açıqlayıb. Onun sözlərinə görə, “Yuventus” həm idman nəticələrini, həm də maliyyə göstəricilərini balanslaşdırmalı və UEFA ilə imzalanan “Settlement Agreement” çərçivəsində müəyyən edilmiş tələblərə əməl etməlidir.
Karnevali transfer planları barədə də danışıb. O, klubun hazırkı maliyyə vəziyyətində eyni transfer pəncərəsində üç böyük ulduz futbolçu almağının real olmadığını etiraf edib. Rəhbərin sözlərinə görə, komanda daha çox düzgün seçimlər etməli və bazarda yaranan imkanlardan yararlanmalıdır.
“Rəqabətədavamlı komanda istəyirik və riayət etməli olduğumuz müəyyən sərhədlərin olduğunu bilirik. Transfer bazarının necə inkişaf edəcəyini görəcəyik. Üç böyük ulduz almaq istərdim, amma bu mümkün deyil. Buna görə də komandanı ağıllı addımlarla və fürsətləri dəyərləndirməklə gücləndirmək lazımdır”, – deyə o qeyd edib.
Karnevali həmçinin qarşıdakı yay transfer pəncərəsində mühüm futbolçulardan birinin satılmasının mütləq olmadığını bildirib. Onun sözlərinə görə, klubun icarəyə göndərdiyi və satınalma opsionu olan futbolçulardan əldə ediləcək gəlirlər maliyyə balansını qorumağa kifayət edə bilər.
“İyun ayında transfer bazarını maliyyələşdirmək üçün mühüm satış edilməsinin mütləq olacağı dəqiq deyil. Satınalma opsionu ilə icarəyə göndərdiyimiz futbolçular var. Bəlkə də bu kifayət edə bilər”, – deyə “Yuventus”un CEO-su əlavə edib.
