Türkiyə milli futbol komandasının yeni baş məşqçisinin kim olacağı ilə bağlı qeyri-müəyyənlik davam edir. İtaliyalı mütəxəssis Vinçenso Montella ilə yolların ayrılmasından sonra əsas namizədlərdən biri hesab edilən Arda Turanın açıqlamalarından sonra diqqət yenidən Şenol Güneşə yönəlib.
BEY.AZ xəbər verir ki, “Sabah” nəşrinin məlumatına görə, Türkiyə Futbol Federasiyasının (TFF) rəhbərliyi ötən cümə günü İstanbula gələn Arda Turanla görüşərək ona rəsmi təklif edib. Lakin Turanın son açıqlamalarından sonra federasiyanın digər namizədləri nəzərdən keçirməyə başladığı bildirilir.
Məlumata əsasən, Arda Turan yerli mütəxəssislər arasında yeganə namizəd olub. İndi isə TFF-nin əcnəbi məşqçilər üzərində daha çox dayanacağı gözlənilir. Digər ehtimal isə noyabrda Millətlər Liqası çərçivəsində Belçika və Fransa ilə keçiriləcək oyunlara müvəqqəti yerli baş məşqçinin rəhbərliyi altında çıxmaqdır.
Nəşrin yazdığına görə, federasiyanın nəzərdən keçirdiyi variantlardan biri də 74 yaşlı Şenol Güneşdir. Əgər Millətlər Liqasının oyunlarına qədər yeni baş məşqçi ilə bağlı konkret qərar verilməsə, Türkiyə millisinin qarşıdakı iki matçda müvəqqəti çalışdırıcının rəhbərliyi altında meydana çıxması mümkündür.
Şenol Güneş daha əvvəl iki ayrı dövrdə Türkiyə millisinin baş məşqçisi olub. O, 2000–2004-cü illərdə komandanı çalışdırıb, 50 oyunda orta hesabla 1,64 xal qazanıb və millini dünya çempionatının üçüncülüyünə yüksəldib. Təcrübəli mütəxəssis 2019–2021-ci illərdə də yığmaya rəhbərlik edib, bu müddətdə 32 oyunda komandanın başında olub və Türkiyə Avropa çempionatında iştirak edib.
Güneş son olaraq “Trabzonspor”un baş məşqçisi vəzifəsində çalışıb. O, 2025-ci ilin martında klubdan ayrılıb.
